
第一世噶玛巴教言集1KM20ཕག་མོ་ལྷ་ལྔའི་དབང་ཆོག་བཞུགས་སོ། །
1-2-167b
༄༅། །ཕག་མོ་ལྷ་ལྔའི་དབང་ཆོག་བཞུགས་སོ། །
༄༅། །ཕག་མོ་ལྷ་ལྔའི་དབང་ཆོག་བཞུགས་སོ། །གུ་རུ་ལ་ན་མོ། རྗེ་བཙུན་རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །སྐུ་གསུང་ཐུགས་ཀྱི་རྒྱུད་མཛད་མ་ལས་ཁ་ཚར་དང་བཅས་པ་འདི་ལ་དབང་བསྐུར་བ་དང་། མཆོད་པ་དང་། གཞན་དབང་དུ་བྱ་བ་དང་། བགེགས་ལ་བྱ་བའོ། །གང་ཞིག་སློབ་མ་ལ་དབང་བསྐུར་བར་འདོད་ན། ཤིན་ཏུ་དབེན་པ་ཉམས་དགའ་བའི་གནས་སུ། བཻ་རོ་ཙ་ནའི་མཚན་མའམ་ཆང་གི་རྒྱུན་འབབ་པ་དང་། ཌཱ་མ་རུའི་སྒྲ་གྲགས་པ་དང་། བུད་མེད་རྒྱན་ཅན་མང་པོ་འདུས་པ་དང་། དངོས་སུ་ཞལ་མཐོང་པའོ། །གྲངས་ཀྱི་བསྙེན་པར་བྱའོ། །བཻ་རོ་ཙ་ན་ལ་ཨོཾ་ཨཱཿཧཱུྃ་སྭཱ་ཧཱ། ཧ་རི་ནི་ས་བཏགས་ལ་བསྙེན་པ་ཞག་གསུམ་མམ་བདུན་དུ་
1-2-168a
༄༅། །བྱའོ། །དེ་ནི་སྔོན་འགྲོའོ། །དེ་ནས་གནས་ཁང་ཕྱག་དར་བྱས་ལ། བླ་རེས་དང་འགྲིག་ཡོལ་བྱས་ལ། ས་གཞི་དྲི་དང་ཆང་གིས་བྱུགས །དཀྱིལ་འཁོར་རེ་ཁ་དཀར་པོས་བསྐོར། དབུས་སུ་ཆོས་འབྱུང་དམར་པོ་བྲི། ཆོས་འབྱུང་ནང་དུ་པད་མ་འདབ་བཞི་དམར་པོ་བྲི། དབུས་སུ་པཾ་བྲི། པདྨ་འདབ་བཞི་ལ་ཧ་རི་ནི་ས་བཞི་བྲི། བུམ་པ་མགུལ་ཆིངས་ཅན་དྲིའི་ཆུས་བཀང་ལ་པདྨའི་ལྟེ་བར་བཞག །ཐོད་པ་མཚན་ལྡན་ཆང་གིས་བཀང་ལ་བུམ་པའི་ཁར་བཞག །དར་དམར་པོས་ཞལ་ཁེབས་བྱ། མེ་ལོང་ལ་སིན་དྷུ་ར་བཙགས་ལ་ཆོས་འབྱུང་རྐྱང་པ་བྲི། དབུས་སུ་བཾ་ལ་བཻ་རོ་ཙ་ནིའི་སྔགས་གཡོན་བསྐོར་དུ་བྲིས་ལ་༧ ཐོད་པའི་སྟེང་དུ་སྔགས་མགོ་རང་ལ་བསྟན་ལ་བཞག་གོ །ཤ་སྣ་ཚོགས་པའི་གཏོར་མ་ལྔ་བཅས་ལ། པདྨ་འདབ་བཞིའི་སྟེང་དུ་རེ་རེ་བཞག །གཅིག་གང་བདེ་བར་བཞག །མར་མེ་ལྔ། སྤོས་རེང་། ལྷ་བཤོས་ལྔས་བསྐོར། བླ་མ་དཀོན་མཆོག་གི་མཎྜལ་ལ་མཆོད་པ་འབྱོར་ཚད་བཤམ། རང་གི་མདུན་དུ་མཆོད་པ་ལྔ་བཤམ། རྩ་བའི་ཡོན་ཆབ་དང་བཟེད་ཞལ་ལྔ་བཞག །ཆང་མཆོད་པའི་རྒྱུ་ཐོད་པ་མཚན་ལྡན་འཆང་གིས་བཀང་ལ་བཞག །ཚོགས་ཀྱི་མཆོད་པ་འབྱོར་ཚད་བཤམ། ཆོས་སྐྱོང་གི་གཏོར་མ་འབྱོར་ཚད་བཤམ། དེ་ལྟར་བཅས་ཐོན་པ་དང་དཀྱིལ་འཁོར་ཡོལ་བས་བསྐོར། དེ་ནས་རང་ཉིད་སྟན་བདེ་བ་ལ་འདུག་
1-2-168b
ནས༑ སློབ་མས་ཁྲུས་བྱས་ལ། སློབ་དཔོན་གྱིས་ལས་རྒྱུ་འབྲས་ཀྱི་ཆོས། འཆི་བ་མི་རྟག་པའི་ཆོས་བཤད་བྱ། སྐྱབས་འགྲོ་སེམས་བསྐྱེད་རྒྱས་པར་བྱ། དེ་ནས་བླ་མ་དཀོན་མཆོག་ལ་མཎྜལ་དང་པཱུ་ཛ་རྣམས་རིམ་གྱིས་བཤམས་ལ་འབུལ། རང་ཉིད་བསྐྱེད་རྫོགས་བསྒོམ། བཟླས་པ་བྱ། དེ་ནས་བསྙེན་པ་ཐོན་པ་དང་། མེ་ལོང་གི་བཾ་ལས་འོད་འཕྲོས་པས། སེམས་ཅན་ཐམས་ཅད་ལ་ཕོག །སྡིག་སྒྲིབ་དག་ནས་རྗེ་བཙུན་མར་གྱུར། འོད་ཟེར་ཚུར་འདུས་པཾ་ལ་ཐིམ། རྗེ་བཙུན་མར་གྱུར་པར་བསྒོམ་ལ། རང་གི་ལག་མཐིལ་གཡོན་པར་ཆོས་འབྱུང་། པད་མར་བཅས་ཏེ་བསམས་ལ། ལྟེ་བར་བཾ་བསམ། འདབ་མ་བཞི་ལ་ཡི་གེ་བཞི་བསམ། ཐོད་པའི་ཆང་ནང་དུ་ཡང་དེ་བཞིན་དུ་བསམ། པཾ་ལས་འོད་འཕྲོས། སེམས་ཅན་ཐམས་ཅད་ལ་ཕོག །སྡིག་སྒྲིབ་དག་ནས་རྗེ་བཙུན་མར་གྱུར། འོད་དེ་ཚུར་འདུས་པཾ་ལ་ཐིམ་པས། རྗེ་བཙུན་མར་གྱུར་པར་བསམ་ཞིང་། པཱུ་ཛ་ལྔ་འབུལ། བསྟོད་པ་བྱས་པས། རྗེ་བཙུན་མ་འོད་དུ་ཞུ་ནས་ཡེ་ཤེས་ལྔར་གྱུར། ཡེ་ཤེས་ལྔ་འོད་དུ་ཞུ་ནས། ཐམས་ཅད་བདུད་རྩིར་གྱུར་པར་བསམ། རྩ་སྔགས་བརྗོད། གནས་ཁང་ལ་གཏོར་བས་བགེགས་ཐམས་བསྐྲད་པས་མཁའ་འགྲོ་མའི་དྲ་བ་དང་གུར་དུ་གྱུར་པར་བསམ། རང་ལ་གཏོར་བས། བ་སྤུའི་བུ་ག་ཐམས་ཅད་མཁའ་འགྲོ་མས་གཏམས་པར་བསམ། ལྕེ་ཐོག་ཏུ་
1-2-169a
༄༅། །བཞག་པས་བདུད་རྩི་མྱང་བར་བྱ། ཨོཾ་ཨཱཿཧཱུྃ་བརྗོད་པས་ཚོགས་དང་མཆོད་རྫས་ལ་གཏོར་བས་ཐམས་ཅད་བདུད་རྩིར་གྱུར་པར་བསམ། དཀྱིལ་འཁོར་ལ་ལྷའི་མཆོད་པ་ལྔ་འབུལ། བདུད་རྩི་དང་ཚོགས་ཀྱི་མཆོད་པ་དང་། བསྟོད་པ་བྱ། དེ་ནས་མེ་ལོང་དང་རྗེ་བཙུན་མའི་ཐུགས་ཀའི་བཾ་ལས་འོད་འཕྲོས། ཨཽ་རྒྱན་ནས་མཁའ་འགྲོ་མ་ཐམས་ཅད་ཀྱི་སྐུ་གསུང་ཐུགས་ཀྱི་ཡེ་ཤེས་ཀྱི་རྗེ་བཙུན་མའི་གསང་གནས་བདུད་རྩི་ཐམས་ཅད་བཀུག་ནས་བཾ་ལ་ཐིམ། བཾ་ཐོད་པའི་བདུད་རྩི་དང་གཉིས་མེད་ཟགས་པས་བུམ་པའི་རྫས་དང་གཉིས་སུ་མེད་པར་གྱུར། སྐབས་འདི་སློབ་མ་རྗེ་བཙུན་མར་བསྒོམ་དུ་བཅུག་ལ་ལས་བདུད་རྩི་བབ་པས་ཐོད་པ་ཁེངས། ཐོད་པའི་བདུད་རྩིས་བུམ་པ་ཁེངས་པར་བསམ། དེ་ནས་ཡོལ་བ་བཤུས་ལ་བྱིན་དབབ་པ་ནི། བདུད་རྩིས་ཆག་ཆག་གདབ། རེ་ཁ་དཀར་པོར་བྱ། ཆོས་འབྱུང་པདྨ་དང་བཅས་པ་སློབ་མའི་གྲངས་བྲིས་ལ། ནས་ཀྱི་ཚོམ་བུ་ལྔ་བཀོད་ལ། དེའི་སྟེང་དུ་སློབ་མ་ཀུན་ལང་དུ་བཅུག་ལ། བླ་མ་དང་རྡོ་རྗེ་རྣལ་འབྱོར་མ་ལ་ཕྱག་བྱེད་དུ་བཅུག །གསོལ་བ་གདབ་པ་ནི། བླ་མ་རྗེ་བཙུན་མ་ཐམས་ཅད་བདག་ལ་དགོངས་སུ་གསོལ༑ བདག་རྡོ་རྗེ་འཛིན་པ་མིང་འདི་ཞེས་བགྱི་བ་ལ་རྗེ་བཙུན་མའི་སྐུ་གསུང་ཐུགས་ཀྱིས་བྱིན་གྱིས་བརླབ་དུ་གསོལ། ཞེས་ལན་གསུམ་བརྗོད་དུ་བཅུག་ལ། ཙོག་པུར་བསྡད་ལ་རྐང་བོལ་གཡོན་པས་
1-2-169b
གཡས་པ་མནན་དུ་བཅུག་ལ། རྐང་མཐིལ་བསྟད་པའམ་ཡང་ན་ལང་དུ་བཅུག་ལ། སྤྱི་བོར་ཆོས་འབྱུང་གི་ཕྱག་རྒྱ་བཅས་ལ། རྗེ་བཙུན་མར་བསྒོམ་པའི་ཐུགས་ཀར་པད་ཉིའི་སྟེང་དུ་བཾ་ལ་བཻ་རོ་ཙ་ནཱི་གཡོན་བསྐོར་དུ་དམར་སྒ་ར་ར་འཁོར་བ་ལ་ཤེས་པ་གཏོད་དུ་བཅུག་ལ། ཡང་ན་ལྟེ་བའི་དབུས་སུ། ཆོས་འབྱུང་དམར་པོ་འདབ་འདི་ལ་ཕྱག་ལེན་མཛད་ཟེར་མ་ཡི་གེ་བཞི་དང་བཅས་པ། གཡོན་བསྐོར་དུ་དམར་སྒ་ར་ར་འཁོར་བ་ལ་ཤེས་པ་གཏོད་དུ་བཅུག་ལ། གུ་གུལ་དང་ཚིལ་ཆེན་གྱི་དུད་པ་བཏང་ལ། སློབ་དཔོན་གྱིས་སློབ་མ་ལྷར་བསྒོམ་དུ་བཅུག་ལ་དྲིལ་བུ་དང་ཌཱ་མ་རུའི་སྒྲ་སྒྲོལ་ལ། ཨོཾ་བཛྲ་བཻ་རོ་ཙ་ནི་ཡེ་ཧ་རི་ནི་ས་ཧཱུྃ་ཕཊ་སྭཱ་ཧཱ། ཨོཾ་བཛྲ་བ་རཱ་ཧི་ཨཱ་བེ་ཤ་ཡ་ཨ་ཨ། ཞེས་བྱ་བའི་སྔགས་ཀྱིས་བྱིན་མ་ཕེབས་ཀྱི་བར་དྲག་ཏུ་བརྗོད། སྐུ་ལ་བབས་ན་འཕར་བའོ། །གསུང་ལ་བབས་ན་སངྒཱི་ཏའི་སྐད་འདོན་ཐུགས་ལ་བབས་ན་རྟོག་པ་སྐྱེའོ། །དེ་ནས་བུམ་པའི་ཆུས་ཁྲུས་བྱས་ལ་གནས་གསུམ་དུ་སིན་དྷུ་རའི་ཐིག་ལེ་བྱས་ལ། ཐུགས་ཀར་གྲི་གུག་བསྒོམ་དུ་བཅུག་ལ། ཐོད་པའི་ཆང་བླུད་པ་ནས། དབང་བཞི་ངོ་སྤྲོད་པ་ལ། བུམ་པའི་ཆུས་ཁྲུས་བྱས་པས་བུམ་དབང་། སིན་དྷུ་རའི་ཐིག་ལེ་བྱས་ནས་སྙིང་གར་རྗེ་བཙུན་མའི་ཕྱག་མཚན་གྲི་གུག་བསྒོམ་དུ་བཅུག་པ་ནི་གསང་བའི་དབང་། ཐོད་པའི་ཆང་བླུད་པ་ནི་ཆང་གི་རོ་བདེ་བ་མྱང་བ་ནི་ཤེས་རབ་
1-2-170a
༄༅། །ཡེ་ཤེས་ཀྱི་དབང་། དེ་གསུམ་ངོ་བོ་དབྱེར་མེད་པ་ནི་དབང་བཞི་པའོ། །དེ་ནས་ཆང་ཕུད་འབུལ། ཚོགས་གཏོར་མར་བཅུག་ལ་གཏོར་མ་ལྔ་པོ་རྗེ་བཙུན་མ་ལ་འབུལ། གཏོར་མ་གཞན་ཆོས་སྐྱོང་ལ་འབུལ། དེ་ནས་གཏོར་མ་གཅིག་བཏང་། བཀྲ་ཤིས་བརྗོད་ལ་ཚོགས་ལ་ལོངས་སྤྱད། དེ་ནས་ལྷ་གཏོར་བཏང་། ད་ལའི་ལྷ་ལ་བཏང་རག་གི་པཱུ་ཛ་འབུལ་གླུ་གར་ལ་སོགས་པཱུ་ཛའི་རིགས། བཤགས་པ་བྱས་ལ་ཨཽ་རྒྱན་དུ་གཤེགས་སུ་གསོལ། དཀར་གཏོར་དེ་རིགས་དྲུག་དང་འདིའི་ཉེ་འཁོར་ན་གནས་པའི་གཞི་བདག་ལ་འབུལ། དགེ་བའི་རྩ་བ་བྱང་ཆུབ་དུ་བསྔོ། རྗེ་བཙུན་མའི་གསང་སྒྲུབ་ལས་དབང་བསྐུར་བའི་ཆོ་ག་རྫོགས་སོ།། །།


目录
ཕག་མོ་ལྷ་ལྔའི་དབང་ཆོག་བཞུགས་སོ། །